«Заң мен тәртіп» қағидаты тек құқық бұзушылық орын алғаннан кейін шара қолдануды емес, оның алдын алуды да көздейді. Сондықтан қоғамда кез келген заңсыз әрекетке немқұрайлы қарамау, ұсақ құқық бұзушылықтардың өзіне жол бермеу маңызды. Осындай көзқарас қалыптасқан жағдайда ғана құқықтық тәртіп тұрақты сипат алады.
Бұл ретте құқық бұзушылыққа «нөлдік төзімділік» ұстанымының маңызы артады. Қоғамдық орындардағы тәртіпсіздік, абаттандыру талаптарын бұзу, ұсақ бұзақылық немесе басқа да заңға қайшы әрекеттер елеусіз мәселе ретінде қабылданбауы керек. Себебі мұндай әрекеттерге бейжай қарау уақыт өте келе күрделірек құқық бұзушылықтарға алып келуі мүмкін.
Қауіпсіз қоғам қалыптастыруда профилактикалық жұмыстың да орны ерекше. Құқық қорғау органдары азаматтарға заң талаптарын түсіндіріп, құқық бұзушылықтың салдары туралы ақпарат беріп қана қоймай, тұрғындармен тұрақты байланыс орнатуы қажет. Ал азаматтар өз кезегінде құқық қорғау органдарына сенім білдіріп, заң бұзушылықтардың алдын алуға белсенді атсалысуы маңызды.
«Қауіпсіз қоғам» тұжырымдамасының негізгі мәні де осыған саяды. Қауіпсіздік тек полицияның немесе басқа да мемлекеттік органдардың жұмысына тәуелді емес. Ол қоғам мүшелерінің күнделікті тәртібі мен жауапкершілігінен басталады.
Сондықтан заңды сақтау мәдениетін балалық шақтан қалыптастыру, жастар арасында құқықтық сауаттылықты арттыру және азаматтарға өз әрекетінің қоғамға әсерін түсіндіру маңызды. Әр адам қоғамдық тәртіпті сақтауға үлес қосқан жағдайда ғана заң үстемдігі нығайып, тұрақты әрі қауіпсіз орта қалыптасады. «Заң мен тәртіп» қағидатын орнықтыру – бір реттік науқан емес, ұзақ мерзімді қоғамдық міндет. Оның нәтижесі азаматтардың заңға деген құрметінен, құқық бұзушылыққа төзбеушілігінен және өз қауіпсіздігі мен айналасындағылардың қауіпсіздігіне жауапкершілікпен қарауынан көрінеді.
