АҚШ президенті Дональд Трамп Truth Social желісінде Венесуэламен «әлем тарихындағы ең ірі» мұнай келісімі жасалғанын мәлімдеді.
«АҚШ дәл қазір Венесуэламен әлем тарихындағы ең ірі мұнай келісімін жасасты», — деп жазды Ақ үй басшысы.
Трамптың айтуынша, келісімге мемлекеттік хатшы Марко Рубио мен Пентагон басшысы Пит Хегсет Венесуэланың уақытша президенті Делси Родригеспен және жекеменшік бизнес өкілдерінің қатысуымен қол жеткізген.
Ол АҚШ Венесуэладағы расталған 65 миллиардтан астам баррель мұнай қорын «америкалық салық төлеушілерге ешқандай шығынсыз» бақылауға алғанын айтты.
Трамптың сөзінше, бұл келісім АҚШ-тың мұнай қорын екі еседен астам арттырып, жеткізілімді кеңейтеді және бензин бағасын ұзақ мерзімге төмендетуге ықпал етеді. Ол мұның Венесуэлаға да пайда әкеліп, Каракас пен Вашингтон арасындағы қатынасты нығайтатынын жеткізді.
Марко Рубио келісім АҚШ-қа тұрақты қор мен арзан мұнайға қол жеткізуге мүмкіндік беретінін, ал Венесуэлаға шамамен 100 миллиард доллар жеке инвестиция, мыңдаған жоғары жалақысы бар жұмыс орны және экономиканы қалпына келтіруге қолдау әкелетінін айтты.
Бұған дейін Bloomberg Пентагонның Венесуэла мұнайына тікелей қол жеткізу мәселесін талқылап жатқанын жазған. Келіссөздер шамамен 17 кен орнына, соның ішінде Ориноко мұнай белдеуіндегі және Маракайбо көлі маңындағы учаскелерге қатысты болған. Қарастырылған нұсқалардың бірі кен орындарын 100 жылға жалға алуды көздеген.
