Президент Қасым-Жомарт Тоқаев Курултай сайлауының қарсаңында қазақстандықтарға үндеу жасады. Мемлекет басшысының сөзін республикалық телеарналар көрсетті.
Тоқаевтың айтуынша, алдағы жексенбіде елімізде жаңа бір палаталы Курултайға алғашқы сайлау өтеді. Ол соңғы жылдары Қазақстан ауқымды реформалар жолымен нық ілгерілеп келе жатқанын, ал алда әлі де атқарылатын жұмыс көп екенін атап өтті.
«Халық Конституциясы күшіне енгеннен кейін бұл сайлау барлық азаматтың игілігі үшін жаңа реформалардың бастау нүктесіне айналып, қазіргі Қазақстан жылнамасында жаңа белес ашады», – деді президент.
Мемлекет басшысы Курултай сайлауын партиялар дайындалуы үшін алдын ала жариялағанын айтты. Соның нәтижесінде алғашқы сайлау науқаны мазмұнды, ашық, бәсекелі және өркениетті өткенін жеткізді. Президенттің сөзінше, азаматтар да осыны ортақ пікір ретінде бағалаған.
Ол үгіт-насихат кезінде партиялар өз бағдарламаларын дәлелді түрде таныстырғанын, теледебаттар мен әлеуметтік желідегі пікірталастар арқылы қоғам экономикадан бастап мәдениетке дейінгі түрлі саладағы бастамаларды салыстыру мүмкіндігіне ие болғанын айтты. Тоқаевтың пікірінше, бұл елде қоғамдық күн тәртібінің өзгергенін және оның орталығына жасампаздық пен даму идеялары шыққанын көрсетеді.
Президент қоғамдық талқылауға жастардың, кәсіби қауымдастық өкілдерінің және кәсіпкерлердің белсенді араласуын оң өзгеріс ретінде бағалады. Оның айтуынша, бұл – саяси мәдениетті арттыруға және азаматтардың мемлекет басқаруға қатысуын кеңейтуге бағытталған реформалардың нәтижесі.
Тоқаев сайлау барысын көптеген отандық және халықаралық бақылаушылар қадағалап отырғанын да айтты. Ол дауыс беру қорытындысында Курултайға кәсіби мамандар мен отаншыл азаматтар сайланатынына сенім білдірді. Президент жаңа заң шығарушы орган елді жаңғыртудың ортақ алаңына айналып, реформалардың қарқынын айқындайтынын атап өтті.
«Бұл жексенбі – Қазақстан тарихында жаңа бет ашылатын тағдырлы сәт. Біздің болашағымыз миллиондаған азаматтың саналы таңдауына, әрқайсыңызға байланысты», – деді Қасым-Жомарт Тоқаев. Ол барлық азаматты, әсіресе жастарды, сайлауға қатысып, ел дамуына үлес қосуға шақырды.
