Кривой Рогтағы ең ірі сауда орталығына жасалған Ресей соққысы салдарынан кемінде 16 адам қаза тауып, 130 адам жараланды. Зардап шеккендердің арасында жағдайы ауыр балалар бар. Ресей қорғаныс министрлігі бұл шабуылға әзірге түсінік берген жоқ.
Жұма кешінде Днепропетровск облыстық әкімшілігінің басшысы Александр Ганжа құтқарушылар үйінді астынан тағы бір құрбанның денесін алып шыққанын хабарлады. Бұған дейін Кривой Рог қорғаныс кеңесінің төрағасы Александр Вилкул қаза тапқандар саны 15 екенін, олардың екеуі ауруханада көз жұмғанын айтқан еді.
Вилкулдың мәліметінше, жараланғандар саны 130-ға жеткен. «29 адам ауыр хәлде жатыр, олардың ішінде 5 бала бар. Қазір операция бөлмесінде 8 науқас бар, олардың біреуі — бала. Бір қыз бала, 14 жастағы қыз Днепрге жеткізілді», — деп жазды ол.
Ол сондай-ақ із-түзсіз жоғалған адамдар бар екенін, олардың байланысқа шықпағанын айтты. Украина президенті Владимир Зеленский әлеуметтік желілерде құтқару операциясы жалғасып жатқанын, соққы бірнеше ресейлік дронмен жасалғанын жазды.
Зеленскийдің айтуынша, дрондар екі толқында соққан: бірінші соққы мен өрттен шамамен жарты сағат өткен соң құтқару қызметтеріне қайта шабуыл жасалған. Александр Вилкул екінші соққы реактивті дрондармен жасалғанын хабарлады.
«Суспiльне» телеарнасына сөйлеген сауда орталығының қызметкері Валерияның айтуынша, соққы кезінде ғимаратта көп адам болған. «Кешенде адам өте көп еді. Бәрі айқайлап, жан-жаққа жүгірді, көп адам жараланды. Біз әріптестеріммен бірге бірден модульді қауіпсіз орынға жүгірдік. Мен бірден шығып кеттім. Тек еденде қан жатқанын көрдім. Сол ғана», — деді ол.
Украинаның төтенше жағдайлар жөніндегі мемлекеттік қызметі алғашқы минуттарда полиция мен құтқарушылар келушілерді эвакуациялап, алғашқы көмек көрсетіп, өртті сөндіре бастағанын, алайда осы кезде Ресей қайта соққы жасағанын хабарлады. Кешке қарай құтқару-қазу жұмыстары жалғасты, ал өрт сауда орталығының шамамен үштен бір бөлігін шарпыған.
Түнге қарай «Дніпро Обласний» Telegram-арнасы Кривой Рогқа Харьков, Запорожье, Кировоград және Донецк облыстарынан қосымша құтқарушылар жіберілгенін жазды.
