Британдық БАҚ мәліметінше, қайғылы оқиға өткен жылдың қараша айында Лондондағы Marriott Hotel Kensington қонақүйінде болған. Қонақүй қызметкерлері бөлмеден жауап болмаған соң ішке кіріп, ханзаданы жуынатын бөлменің еденінде ес-түссіз жатқан күйінде тапқан. Кейін оның қайтыс болғаны анықталған.
Тергеу барысында бөгде адамның қатысы немесе зорлық-зомбылық белгілері анықталмаған. Бейнебақылау жазбаларына сәйкес, ханзада өлерінің алдында қонақүйден аз уақытқа шығып, кейін бөлмесіне жалғыз оралған.
Сот-медициналық сараптама қорытындысына сәйкес, Абдулла бин Фахадтың жүрегі алкоголь мен бірнеше психобелсенді заттарды қатар қолданудың салдарынан тоқтаған. Оның ағзасынан алкогольдің жоғары мөлшерімен бірге GHB есірткісі, каннабис және мазасыздыққа қарсы дәрілік препараттардың іздері анықталған.
Істі қараған коронер бұл оқиғаны жазатайым жағдай салдарынан болған өлім ретінде бағалап, өзіне қол жұмсау немесе қасақана әрекет белгілері жоқ деген қорытындыға келген.
Тергеу материалдарына сәйкес, ханзада қайтыс болардан шамамен үш ай бұрын Лондондағы тәуелділікті емдеуге маманданған клиникалардың бірінде алкоголь мен есірткіге тәуелділікке байланысты оңалту курсынан өткен. Дәрігерлер оны ем аяқталған кезде өзіне қол жұмсау қаупі жоқ деп бағалаған.
Абдулла бин Фахад бин Абдулла бин Абдулазиз бин Жалави Әл Сауд Сауд Арабиясының қазіргі королі Салман бин Әбдулазиз Әл Саудтың туысы болған. Оның қайтыс болғанын былтыр Сауд Арабиясының Корольдік соты ресми түрде растаған.
