Тарихи қорымдарды Ахмет Байтұрсынұлы атындағы Қостанай өңірлік университетінің ғалымдары археологиялық қазба жұмыстары барысында тапқан.
Экспедиция кезінде ежелгі тұрғын үйлердің еден астынан бір баланың және екі ересек адамның жерленген орындары анықталды. Мұндай олжалар неолит дәуірінің археологиялық ескерткіштері арасында өте сирек кездеседі. Мамандардың бағалауынша, бұл жаңалық Қазақстан аумағындағы тас дәуірі археологиясын зерттеуде маңызды ғылыми дереккөз болып саналады.
Қазақстан Ғылым және жоғары білім министрлігінің мәліметінше, ҚӨУ Археологиялық зертханасының аға ғылыми қызметкері, «Торғай ойпатының неолиті» ғылыми жобасының жетекшісі Ирина Шевнинаның айтуынша, археологтар қазба жұмыстары кезінде көбіне тас және сүйек құралдарын, керамика сынықтарын және әшекей бұйымдарды табады. Ал ежелгі тұрғын үйлердің едендерінің астынан табылған жерлеу орындары зерттеліп жатқан ескерткіштердің ғылыми құндылығын едәуір арттырады.
Ғалымдардың айтуынша, тас дәуіріне жататын мұндай жерлеу орындары тек Қостанай облысы үшін ғана емес, бүкіл Қазақстан аумағы үшін де өте сирек кездесетін олжа. Алдын ала зерттеу нәтижелері табылған қорымдардың неолит дәуіріне жататынын көрсетіп отыр.
