Арнайы операция Лилами ауданында басталып, кейін қаланың басқа бөліктеріне де тараған. Тек бір ауданның өзінде 20-дан астам әйел ұсталған.
Ауғанстанның Ізгілікті насихаттау және жамандықтан тыю министрлігінің қызметкерлері қолдарына таяқ ұстап, Альмас-Шарк базары мен Қаср ауданында рейд жүргізген.
Куәгерлердің айтуынша, кейбір әйелдер тексеру мен ұстау кезінде қарсылық көрсетіп, айқайлаған. Лилами ауданындағы дүкен иелерінің бірі рейдтен кейін көшелерде әйелдердің мүлде көрінбей қалғанын айтқан.
«Талибтер кейбір әйелдерді ұстап әкетті, ал басқалары айқайлап қашып құтылуға тырысты», – деді ол.
Сатушының сөзінше, ұсталған әйелдердің көбі хиджаб киіп, денесін толық жауып жүрген.
Бұл операция министрліктің қоғамдық орындарда бет-жүзін ашып жүруге немесе макияж қолдануға тыйым салынғаны туралы ескертуінен кейін жүргізілген. Ведомство талаптарды бұзған әйелдерді қамауға алып, түрмеге жабуы мүмкін екенін мәлімдеген.
Бұған дейін Герат билігі паранджа кимеген әйелдерге мемлекеттік қызметтерді пайдалануға шектеу қойған. Ал жергілікті әйелдердің көпшілігі дәстүрлі паранджаның орнына ұзын жамылғылар мен ирандық немесе араб үлгісіндегі хиджабтарды киюді жөн көреді.
