Гуманитарлық миссия аясында 500-ден астам адамды шығару жоспарланған. Қазіргі уақытта мемлекеттік шекараны 16 елдің шамамен 300 азаматы кесіп өтті. Олардың қатарында Ресей, Орталық Азия елдері, Түркия, Сауд Арабиясы, Германия және Финляндия азаматтары бар. Эвакуацияланғандардың ең көбі – Қытай Халық Республикасының азаматтары (113 адам).
Эвакуацияның негізгі орталығы елдің оңтүстік-шығысындағы Серахс қаласы болды. Мұнда рәсімдерді жеделдету үшін қосымша төрт бақылау-өткізу пункті іске қосылған.
«Фарап» өткізу бекетінде арнайы логистикалық режим енгізілген. Ол Өзбекстан мен Тәжікстан азаматтарына бағытталған, олар «Ашхабад – Түрікменабат» арнайы теміржол бағыты арқылы елдеріне қайтарылуда.
Оқиға орындарында тәулік бойы еріктілер, аудармашылар және медицина қызметкерлері жұмыс істеп жатыр. Келген азаматтарға құжат рәсімдеуде көмек көрсетіліп, тамақ, демалыс және дипломатиялық өкілдіктермен байланыс қамтамасыз етілуде.
Жүктеменің артқанына қарамастан, Түрікменстан шекарасындағы барлық халықаралық өткізу бекеттері қалыпты режимде жұмысын жалғастырып жатыр, деп атап өтті басылым.
