«Әділетті және Прогрессивті Қазақстанның Халықтық Конституциясы үшін!» жалпыұлттық коалициясы 16 ақпаннан бастап ел өңірлерінде жаңа Конституция жобасын талқылау мақсатында кездесулер өткізуде. Коалиция мүшелері бірнеше күн ішінде еліміздің тоғыз өңірін аралап, мыңдаған азаматпен пікір алмасқан.
Кездесулер барысында қоғамның басты сұрақтарының бірі – білім беру және денсаулық сақтау саласындағы тегін қызметтер болды. Жекелеген тұлғалар тарапынан бұл қызметтердің енді ақылы болатыны жөнінде жалған ақпарат таралып жатқаны анықталды. Шын мәнінде Қазақстан әлеуметтік мемлекет болып қала береді. Жаңа Конституция жобасында бұл норма нақты көрсетілген: мемлекеттік бюджеттің шамамен 40 пайызы әлеуметтік салаға бағытталады. Ата Заңның 1-бабында «Мемлекеттің ең жоғары құндылығы – адам, оның өмірі, құқықтары мен бостандықтары» деп айқын жазылған.
Сонымен қатар, жоғары білім беру жүйесінде өзгерістер ұсынылған. Мемлекеттік гранттар арқылы студенттер тек мемлекеттік емес, жеке меншік университеттерде де оқуға мүмкіндік алады. Мысалы, КИМЭП, Мақсут Нарикбаев университеті, Тұран университеті сияқты жеке оқу орындарында грант жеңген студенттер тегін білім ала алады. Бұл норма әлеуметтік кепілдіктерді қысқартуға емес, керісінше оларды нақты әрі заманауи түрде Конституцияда бекітуге бағытталған.
Жаңа Конституция жобасында сөз бостандығы да айқын белгіленген. Сын айту мен адамның қадір-қасиетін қорлау арасындағы айырмашылық нақты ажыратылған. Лауазымды тұлғалардың қызметін сынға алу мүмкіндігі сақталады, бірақ жеке адамның ар-намысы мен қадір-қасиетін қорғау міндеті де қарастырылған.
Сонымен қатар, арнайы құқықтық режимдер енгізу мәселесі де қарастырылған. Бұл Қазақстанның экономикалық егемендігін күшейтуге, инвестициялық тартымдылықты арттыруға бағытталған. Арнайы режимдерде заманауи жұмыс орындары құрылып, көлік және инженерлік инфрақұрылым дамытылады, бұл өңірлердегі халықтың өмір сапасын жақсартуға мүмкіндік береді. Конституциялық деңгейде бекітілген кепілдіктер инвесторларға ұзақ мерзімді сенімділік береді.
Қорыта айтқанда, жаңа Конституция жобасы әлеуметтік кепілдіктерді сақтай отырып, прогрессивті қоғамның сұранысына сәйкес келетін нормаларды қамтиды. Азаматтардың білім алу, денсаулық сақтау, сөз бостандығы және экономикалық мүмкіндіктері одан әрі кеңейтіледі.
