Бұл туралы Бақыт Нұрмұханов мәлімдеді. Оның айтуынша, барлық ұсыныс жан-жақты қаралып, Конституция жобасын жетілдіру кезінде ескерілген. Азаматтар мен сарапшылардың пікірлері бірқатар баптардың мазмұнына өзгеріс енгізуге ықпал еткен.
Мәселен, бұрын 8-бапта меншік құқығының тек мемлекеттік және жеке түрлері ғана көрсетілген. Талқылау барысында бұл тұжырым барлық нысанды қамтымайтыны айтылып, бап жаңа редакцияда жазылды. Енді Қазақстан Республикасында меншік нысандарының барлығы танылады, оларға кепілдік беріледі және тең қорғалады.
Сонымен қатар адам құқықтары мен бостандықтарына қатысты норма күшейтілді. Жобаға сәйкес, әр адамның құқықтары мен бостандықтары туғаннан беріледі, олар абсолютті және ажырамас болып саналады. Заңдардың мазмұны мен қолданылуы осы қағидаларға сай айқындалады.
Сондай-ақ азаматтыққа қатысты ережелер нақтыланды. Қазақстан азаматтары Конституцияда белгіленген құқықтар мен міндеттердің толық көлеміне ие және заң алдында тең. Құқықтар мен бостандықтарды жүзеге асыру басқа адамдардың құқықтарын бұзбауы, конституциялық құрылыс негіздеріне, қоғамдық тәртіпке және азаматтардың денсаулығына зиян келтірмеуі тиіс.
