Ішкі істер министрі Ержан Саденов Шымкент қаласына жұмыс сапарымен барып, полиция департаментінің жаңа бастығын — генерал-майор Мұхтар Қожаевты таныстырды.
Министр қаладағы криминогендік ахуалға қатысты алаңдаушылығын білдіріп, жаңа басшылыққа нақты міндеттер жүктеді. Оның айтуынша, полициядағы қатаң тәртіп — нәтиже мен қоғам сенімінің негізгі шарты.
Саденов қылмыстарды жасыру, істі созбалаңға салу және жемқорлық фактілерін қатаң сынға алды.
«Тәртіп жоқ жерде нәтиже жоқ, сенім жоқ, бедел құлайды. Әрбір заңбұзушылық үшін жеке, аты-жөнімен жауапкершілік болады», — деді министр.
Министр резонансты істердің тергелуіне, соның ішінде Нұрай Серікбайдың өліміне қатысты іс пен ұйымдасқан қылмысқа қарсы бөлімшелер жұмысына ерекше назар аударды.
Сондай-ақ сталкингке қарсы күрес, ұйымдасқан қылмыстың жолын кесу және құқықбұзушылықтың алдын алу бағыттары күшейтілетіні айтылды. Анықталған заңбұзушылықтарға байланысты ҰҚҚҚ (ұйымдасқан қылмысқа қарсы басқарма) басшысы мен оның бөлім жетекшілерінің бірі қызметінен босатылды.
Министр тапсырмасымен қала полициясының барлық бөлімшелеріне кешенді тексеріс басталды.
