Тарихшы Жақсылық Сабитовтың айтуынша, тәуелсіздік жылдары Қазақстанда іргелі академиялық зерттеулер өте аз болған. Бұған дейін жарық көрген бес томдық еңбек кеңестік көзқарастан айтарлықтай алшақтамаған.
Жаңа жеті томдық еңбек функционалдық және құрылымдық тұрғыдан түбегейлі өзгеше болмақ. Әсіресе Орта ғасыр кезеңі кеңейтіліп, бұрынғыдан үш есе көлемді қамтылған. Бұл — Қазақстан тарихындағы көптеген кезеңдерге жаңа ғылыми көзқарас қалыптастырады.
Сабитовтың айтуынша, ең маңызды өзгерістердің бірі — Алтын Орда мен Қазақ хандығы арасындағы сабақтастықты қайта қарау. Қазіргі тарихшылар Ақ Орда жеке мемлекет емес, Алтын Орданың бір резиденциясы болған деген тұжырымға келіп отыр. Осыған байланысты Қазақ хандығының саяси генеалогиясы жаңаша жазылады.
Сонымен қатар, бұрын ғылыми айналымға енбеген жаңа хандар мен тарихи тұлғалар пайда болады. Ал Қазақстанның Ресейге қосылу тарихы да кеңестік «ерікті қосылу» тұжырымынан алшақ қарастырылады.
Сарапшының пікірінше, жеті томдық еңбек жарық көргеннен кейін мектеп оқулықтары мен мемлекеттік білім стандарттары да жаңартылады. Қазіргі оқулықтар 2017–2019 жылдары шыққан және ескі бес томдыққа негізделген.
