Отбасының сөзінше, қылмыс ізін жасыру үшін қаза тапқан Аслан Қыдырбаевтың (марқұм — ред.) үстіндегі жылы киімі (камуфляж) шешіліп, денесі теңіз суымен жуылған. Одан кейін сол күні шамамен сағат 23:30-ға дейінмәйітті А.Жалбағаевтың пикабының жүк салғышына жүк сияқты тиеп, бірнеше сағат бойы алып жүрген. Ақырында, істеген әрекеттерін жасырудың басқа жолын таппай, марқұмның денесін Ақтау қаласындағы №26 қалалық ауруханаға жеткізген.
Туыстарының мәліметінше, трагедия «Кендірлі» демалыс аймағының аумағында болған. Қаза тапқан Аслан Қыдырбаев бес баланың әкесі, отбасының негізгі асыраушысы болған. Оқиға кезінде оның жанында бір-біріне туыс болып келетін үш аңшы жүрген.
Полиция аталған дерек бойынша қасақана адам өлтіру және аса ауыр қылмысты жасыру баптары бойынша қылмыстық іс қозғады.
Күдіктілердің біреуі тергеу изоляторына қамалса, қалған екеуі үйқамаққа алынған. Марқұмның туыстарын әсіресе қылмыс қаруының тағдыры алаңдатып отыр. Күдіктілердің нұсқасы бойынша, оқ атылған мылтық суға түсіп кетіп, әлі күнге дейін табылмаған. Жақындары тергеу әдейі созылып, жеткілікті деңгейде жүргізілмей жатыр деп қауіптенеді.
«Үйқамақ түріндегі бұлтартпау шарасына қарамастан, аталған тұлғалар заңда белгіленген шектеулерді өрескел бұзып, қала ішінде еркін жүр. Бұл бізді қатты алаңдатады. Қылмыс жасалғанына бір айға жуық уақыт өтсе де, тергеу органдары А.Қыдырбаевты өлтіруге қолданылған қаруды іздеу бойынша нақты шаралар ұйымдастырған жоқ», — дейді марқұмның туыстары.
Ал өңірлік полиция департаменті тергеу жалғасып жатқанын ғана мәлімдеді.
