Шараның басты мақсаты — науқас балаларға қуаныш сыйлап, оларға мерекелік көңіл күй қалыптастыру. Бұл күні отыздан астам бала тәтті сыйлықтар мен жылы лебізге бөленді. «AMANAT» партиясының еріктілері мен аниматорлар қызықты ойындар, әзіл-сықақ және шағын қойылымдар арқылы балаларға шаттық сыйлап, олардың жүзінде шынайы күлкі мен қуаныш отын жақты.
Дәрігерлердің айтуынша, мұндай шаралар балаларға эмоциялық қолдау көрсетіп, ем-шаралардан бір сәт назарын бөлуге мүмкіндік береді.
Айта кетейік, «Ақсай» балалар ауруханасы — орталық жүйке жүйесі, тірек-қимыл аппаратының бұзылыстары, эндокринологиялық және тұқым қуалайтын аурулары бар балаларға көмек көрсететін көпсалалы медициналық мекеме. Мұнда күн сайын үлкен жауапкершілік пен жанашырлықты талап ететін маңызды жұмыс – емдеу, оңалту және балалар мен олардың ата-аналарына қолдау көрсету жүзеге асырылады.
«Кішкентай ғана көңіл мен мейірімнің өзі балаға үміт пен қуаныш сыйлай алады. Мен үшін бұл балалардың өздерін жалғыз емес, жанында сенетін әрі қолдайтын адамдар бар екенін сезінуі маңызды. Дәрігерлер мен аурухана ұжымына жанқияр еңбектері мен адами жылулығы үшін шын жүректен алғыс айтамын», — деді Болат Ибрагимұлы.
Осындай қайырымды бастамалар балаларға мереке атмосферасын сезінуге мүмкіндік беріп қана қоймай, емделу кезеңінде жанында әрдайым жылулық пен қамқорлық бар екенін аңғартады.
