2025 жылы Қазақстан экономикасы 6 пайыздан астам өсім көрсетті. Негізгі қозғаушы күштер мұнай өндіру көлемінің артуы мен ішкі сұраныстың жоғары болуы еді.
Ең жылдам дамыған салалар қатарында көлік, құрылыс, тау-кен өнеркәсібі және сауда болды. Бұл ЖІӨ өсіміне салалардың кең ауқымды үлес қосуына мүмкіндік берді.
Алайда ҚҚҚ сарапшылары 2026 жылы бұл әсердің әлсірей бастайтынын айтады. «Фискалдық ынталандырудың қысқаруы, қаржы шарттарының қатаюы және бөлшек несиелендірудің баяулауы күтіледі. Сыртқы күйзелістер болмаса да, экономиканың жедел қарқын алу әлеуеті шектеулі болып отыр», – делінген қауымдастық бағалауында.
Болжамдарға сәйкес, 2026 жылы Қазақстанның ЖІӨ өсімі Ұлттық экономика министрлігінің есебінше шамамен 5,4 пайызды, ал Халықаралық валюта қорының бағалауынша 4,8 пайызды құрауы мүмкін. Бұл көрсеткіштер 2025 жылғы деңгейден айтарлықтай төмен.
Сыртқы экономикалық орта да біркелкі емес. ХВҚ 2026 жылы әлемдік экономиканың өсімі 3,1 пайызға дейін баяулайды деп болжап отыр. Қазақстан үшін қосымша тәуекелдер қатарында шикізат нарығындағы ахуалдың нашарлауы, негізгі сауда серіктестерінің экономикасының баяулауы және геосаяси тұрақсыздықтың сақталуы аталады.
Сарапшылардың айтуынша, АҚШ Федералдық резерв жүйесінің ақша-несие саясатын жұмсартуы дамушы нарықтарға түсетін қысымды азайтуы мүмкін. Алайда мұнай бағасының төмендеуі мен сыртқы баға қолдауының әлсіреуі Қазақстанның экспорттық кірістерін тежейді.
Ұлттық экономика министрлігінің бағалауынша, 2026 жылы сыртқы сауда профициті 9,4 млрд долларға дейін қысқарады. Бұл 2025 жылғы 11,2 млрд доллармен салыстырғанда төмен көрсеткіш.
