Бірыңғай жинақтаушы зейнетақы қорының ақпаратына сай, биыл зейнеткерлік жас бойынша ешқандай өзгеріс жасалмайды. Қазіргі қолданыстағы талаптар сақталады: ерлер 63 жаста, әйелдер 61 жаста зейнетке шығады.
БЖЗҚ мәліметінше, әйелдердің зейнет жасы 2027 жылдың соңына дейін бұрынғы деңгейде қалады. Ал 2028 жылдан бастап кезең-кезеңімен өседі. Жоспар бойынша 2028 жылы әйелдер 61,5 жаста, 2029 жылы — 62 жаста, 2030 жылы — 62,5 жаста, ал 2031 жылдан бастап 63 жаста зейнетке шығады. Осылайша 2031 жылы ерлер мен әйелдер үшін зейнет жасы теңестіріледі.
Әйелдердің зейнет жасын кезеңдеп арттыру — бұрын бекітілген жоспар. Бұл шара тұрғындардың өмір сүру ұзақтығының артуы және зейнетақы жүйесінің тұрақтылығын сақтау қажеттілігімен байланысты. 2025 жылы күтпеген өзгерістер болмайды, ал жоспарланған түзетулер біртіндеп іске асады.