Мемлекеттік кеңесшінің мәліметінше, e-Otinish және Egov порталдарында ашылған «Парламенттік реформа» арнайы бөліміне бір ай ішінде азаматтар, сарапшылар және қоғам қайраткерлерінен шамамен 300 ұсыныс түскен.
Сонымен бірге алты саяси партия да өз көзқарастарын жолдаған:
«Amanat», «Ауыл», «Ақ жол», «Respublica», Қазақстанның халық партиясы және ОСДП.
Олардың ұсыныстарында бірпалаталы парламент үлгісі және партиялар арасындағы өкілеттіктерді қайта бөлу механизмдері туралы идеялар қамтылған.
Жұмыс тобының мүшелері де өз сараптамалық пікірлерін таныстырған.
Қазір барлық ұсыныс сараланып, жүйеленіп жатыр. Жұмыс тобының екінші отырысы 2025 жылғы 2 желтоқсанда өтеді. Онда бастамалар бағыттар бойынша жан-жақты талқыланбақ.
Президент Тоқаев парламенттік реформаның елдің саяси жаңғыруындағы маңызды кезең екенін атап өтіп, әрбір бастаманы мұқият пысықтап, парламенттік жүйені жетілдіруге арналған нақты ұсыныстар әзірлеуді тапсырды.