Оқиға қалай болған?
Төтенше жағдай таң ата орын алған. Өрт сөндірушілер келгенде үй толықтай отқа оранған еді. Жалын шамамен 360 шаршы метр аумақты шарпыған. Көршілердің айтуынша, үйде екі отбасы тұрған, алдыңғы күні олар сүндет той өткізіп, қонақ күткен.
Өрт сөндіріліп, аумақ қоршауға алынды. Мамандар өрттің нақты себептерін анықтап жатыр. ТЖМ мәліметінше, қаза тапқан балалардың арасында сәбилер де болған.
Тергеу басталды
Облыстық полиция департаменті «өрт қауіпсіздігі талаптарын бұзу» бабымен қылмыстық іс қозғады. Тергеушілер оқиғаның барлық мән-жайын анықтап, процессуалдық шешім қабылдайды.
Бала құқықтары жөніндегі уәкіл Динара Закиева да оқиға орнына барып, зардап шеккендердің отбасыларына көңіл айтты. Оның айтуынша, өрт кезінде үйдің шатыры опырылып түскен.
Үкіметтік комиссия құрылды
Президент Қасым-Жомарт Тоқаевтың тапсырмасымен қасіретті оқиғаның себептерін зерттеу үшін Үкіметтік комиссия жасақталды. Комиссияны Премьер-министрдің орынбасары Қанат Бозымбаев басқарады. Оның құрамына ТЖМ, ІІМ, Денсаулық сақтау, Еңбек және әлеуметтік қорғау министрліктерінің өкілдері, сондай-ақ облыс басшылығы енді.
Комиссия өрттің неден шыққанын, қауіпсіздік талаптарының сақталу деңгейін және тиісті қызметтердің әрекетін жан-жақты тексермек.