Жітіқара қаласындағы жанармай құю бекетінде болған тосын жағдай қазақстандықтарды елең еткізді. Әлеуметтік желіде тараған бейнежазбада түлкінің адамдарға тап беріп, тіпті әйелді қуып кеткені көрінеді.
Белгілі болғандай, оқиға қазан айында болған, бірақ ақпарат енді ғана жария болды. Бейнежазбаны түсірген адамды түлкі тістеп алған. Ол дереу ауруханаға жүгініп, дәрігерлер қажетті екпелерді салған. Госпитализация қажет болмаған.
Осы оқиғадан кейін өңірде әкімдік, полиция және ветеринарлық қызмет өкілдерінен құралған арнайы жұмыс тобы құрылды.
Мамандар тұрғындарға ескерту жасады:
Жабайы жануарларға жақындамаңыз және оларды көрсеңіз, дереу 109 нөміріне хабарласыңыз.
Бұған дейін Маңғыстауда қаңғыбас мысық тістеп алған ер адам көз жұмғанын хабарлағанбыз.