Бұл оқиға көпшілікті бейжай қалдырмады. Шаған өзенінің жағасында ойнап жүрген кәмелетке толмаған бала аяқ астынан балшыққа батып, өздігінен шыға алмай қалған. Балшық белінен асып, қозғалған сайын тереңге тарта бастаған.
Жақын маңдағы бау-бақша серіктестігінің тұрғыны бұл көріністі байқап, бірден төтенше жағдайлар қызметіне қоңырау шалған. Оның жылдам әрекетінің арқасында көмек дер кезінде жетті.
Оқиға орнына келген ТЖМ құтқарушылары батпаққа батқан баланы абайлап шығарып алды. Абырой болғанда, бала жеңіл қорқыныштан басқа жарақат алмаған, медициналық көмек қажет болмады.
Құтқарушылар ата-аналарға балаларды су маңында қараусыз қалдырмауды және өзен жағасындағы лайлы, батпақты жерлерге жақындамауға кеңес берді. Бұл оқиға көпшілікке қауіпсіздік ережелерінің қаншалық маңызды екенін еске салды.
