Мобильді интернетпен қамту кеңейіп, 149 жаңа елдімекен қосылды.
5G таралымы алғаш рет аудан орталықтарында іске қосылып, Түркістан қаласынан бөлек, Сарыағаш пен Жетісайда да жаңа технология қолжетімді болды.
IT-білім беруді жаңа деңгейге көтеру мақсатында алғаш болып жасанды интеллект мектептері ашыла бастады.
Қытайдың жетекші IT-компанияларымен әріптестік орнатылды. Компьютер жабдықтары, телекоммуникация, бағдарламалау және әлеуметтік медиа саласындағы Қытайдың үздік компанияларымен байланыс жолға қойылды.
Халықаралық IT Park және Woosong IT университетінің филиалын ашу туралы келісім жасалды. Алғашқы келісім Қытайдың Beijing Fende компаниясымен және Кореяның Woosong IT университетімен бекітілді.
Еске салсақ, Ұлттық статистика бюросының дерегіне сәйкес, 2024 жылдың қаңтар-желтоқсан айларында Түркістан облысында «Ақпарат және байланыс» саласында көрсетілген қызметтер көлемі 10,1 млрд теңгені құрады. Өткен жылмен салыстырғанда 114 % өсімді көрсетіп, республика бойынша көш басында тұр.
Сондай-ақ, 17 мамырда Түркістан «Оқушылар сарайы» ШЖҚ МКК мен Қазақстан педагогикалық ғылымдары академиясымен бірлесе ұйымдастырған «Білім берудегі инновациялар: идеядан іске асыруға дейін» атты республикалық ғылыми-практикалық конференция өтті.
Конференцияның мақсаты – уақыт талабына сәйкес ғылым және білім жетістіктерін қолдана алатын креативті ойлау қабілеті дамыған құзіретті тұлғаны қалыптастыру. Сондай-ақ оқушылардың зерттеу қызметін талқылау, тәжірибе алмасу алаңын ұсыну, мектеп мұғалімдері мен қызметкерлерінің зерттеу жүргізуге деген ынтасын көтеру және білім берудің өзекті мәселелерін талқылау.
Республикалық ғылыми-практикалық конференцияға Қазақстан Республикасы Оқу-ағарту министрлігі, Әл-Фараби атындағы Қазақ Ұлттық университеті мен әлемнің 190 елінде және аумағында жұмыс істейтін Біріккен Ұлттар Ұйымы Балалар қоры (ЮНИСЕФ) және Түркістан облыстық кәсіподақ комитеті қолдау көрсетті.
Жиынға Педагогикалық ғылымдар академиясының президенті, педагогика ғылымдарының докторы, академик Асқарбек Қабікенұлы Құсайынов, Қазақстан Республикасындағы ЮНИСЕФ өкілінің орынбасары Литисия Баззи Вейл, Абылай хан атындағы Қазақ халықаралық қатынастар және әлем тілдері университетінің өкілі, педагогика ғылымдарының докторы, профессор Клара Өмірзаққызы Қонақова, Әл-Фараби атындағы Қазақ Ұлттық университетіндегі инженерлік және жоғары технологиялар кластерінің бас директоры Әмірхан Әділханұлы Темірбаев және ғылым саласының өкілдері арнайы қатысты.
Конференция алдымен жалпы пленарлық отырыстан басталып, алғашқы болып сөз алған Педагогикалық ғылымдар академиясының президенті, академик Асқарбек ҚҰСАЙЫНОВ қатысушыларды құттықтап, тақырыптың өзектілігі мен маңыздылығына толық тоқталды.
Білім берудегі заманауи инновациялық технологиялардың тиімділігі анықталды. Педагогикалық инновация — бұл қойылған мақсаттарға тиімді қол жеткізуге көмектесетін білім беру саласындағы жаңалықтар. Білім берудегі инновациялар деп педагогикалық технологияларды, оқыту әдістері мен құралдарының жиынтығын жетілдіру процесі түсініледі. Қазіргі уақытта инновациялық педагогикалық қызмет кез келген оқу орнының білім беру қызметінің маңызды компоненттерінің бірі болып табылады. Бұл білім беру қызметтері нарығында белгілі бір мекеменің бәсекеге қабілеттілігін құруға негіз құрып қана қоймай, сонымен қатар мұғалімнің кәсіби өсу бағытын, оның шығармашылық ізденісін анықтайды және оқушылардың жеке өсуіне ықпал етеді. Педагогикалық инновация — бұл педагогика саласындағы инновация, білім беру ортасына оның жекелеген компоненттерінің де, тұтастай алғанда білім беру жүйесінің де сипаттамаларын жақсартатын тұрақты элементтерді (инновацияларды) енгізетін мақсатты прогрессивті өзгеріс. Педагогикалық инновациялар білім беру жүйесінің өз ресурстары (дамудың қарқынды жолы) есебінен де, қосымша қуаттарды (инвестицияларды) — жаңа құралдарды, жабдықтарды, технологияларды, күрделі салымдарды және т.б. тарту есебінен де жүзеге асырылады.