Жаңа дәуірдің құралы
Zerocoder мектебінің негізін қалаушы әрі бас директоры Кирилл Пшинниктің айтуынша, ЖИ бүгінде қор нарығынан бастап криптовалютаға, венчурлік жобалардан жылжымайтын мүлікке дейінгі көптеген бағытта қолданылып жатыр. Оның басты артықшылығы – көлемді ақпаратты жылдам өңдеп, инвесторға нақты шешім қабылдауға көмектесуінде. Бұл технология активтерді дұрыс бағалап, инвестициялық портфельді мақсатқа және тәуекел деңгейіне қарай оңтайландыруға мүмкіндік береді.
Алайда сарапшы бір ескерту жасады: ЖИ берген нәтижелер абсолютті ақиқат емес, сондықтан оларды сенімді дереккөздер арқылы тексеру – инвестордың жауапкершілігі.
BlackRock үлгісі: AlphaAgents
ЖИ-дің әлеуетін айқын көрсеткен мысалдардың бірі – BlackRock компаниясының жақында ұсынған AlphaAgents жүйесі. Бұл мультиагенттік модель үш түрлі сараптаманы біріктіреді: фундаменталды талдау, жаңалықтар мен қоғамдық көңіл-күйді бағалау және баға динамикасына жауап беру. Нәтижесінде, әр инвестордың тәуекел профиліне сәйкес келетін икемді шешім ұсынылады. Мұндай жүйелер дәстүрлі аналитиканы толықтырып қана қоймай, оны түбегейлі жаңа деңгейге көтеріп отыр.
Жаңа мүмкіндіктермен бірге жаңа қауіптер
Дегенмен, ЖИ-дің дамуы тек артықшылық емес, тәуекел де әкеледі. Freedom Holding басшысы Тимур Турлов конференция барысында «егер ЖИ жүйелерін нарықтағы қатысушылар әдейі манипуляция жасайтын құралға айналдырса не болады?» деген сұрақ қойды.
Кирилл Пшинник бұл қауіптің барын жоққа шығармайды. Оның пікірінше, ең дұрыс шешім – алдын ала бапталған, киберқауіпсіздік тұрғысынан қорғалған базалық модельдерді пайдалану. Сондай-ақ нарықта өзін тәжірибемен дәлелдеген сенімді шешімдерге арқа сүйеу маңызды.
Жасанды интеллект инвестиция әлемін түбегейлі өзгертуде. Ол аналитиканы жылдам әрі дәл жүргізуге мүмкіндік беріп, инвестордың уақытын үнемдейді. Бірақ технологиялық прогресс әрдайым қос қырлы: жаңа мүмкіндіктермен бірге жаңа тәуекелдер де қатар жүреді. Сондықтан ЖИ-ді қаржы нарығында тиімді қолдану үшін сенімді дереккөздер, қауіпсіз модельдер және сыни ойлау қабілеті бұрынғыдан да қажет болып тұр.