Арнаның байқауынша, ауыл шаруашылығы министрлері үшін күз – ең күрделі кезеңдердің бірі. Себебі дәл осы уақытта егін орағына қатысты сын күшейіп, азық-түлік бағасының құбылуы қоғамның назарында болады. Өткен жылы министр ауысуы да қыркүйек айында орын алған.
Су ресурстары саласы да ерекше назарда. Президенттің бұл бағыттағы талаптары жоғары болғандықтан, жауапты министр үшін кез келген уақытта сын күшеюі мүмкін.
Сауда және интеграция министрлігін арна «от қоюға ыңғайлы мекеме» деп сипаттайды. Бағаның көтерілуі, ішкі саудадағы тұрақсыздық немесе сыртқы экономикалық саясаттағы нәтижесіздік – барлығы ведомствоға саяси тұрғыда соққы әкелуі ықтимал.
Күштік құрылымдарға келсек, күзде резонансты қылмыстық оқиғалар жиілейтініне назар аударылып, бұл ІІМ үшін қосымша сын-қатер туғызады деп болжанады. Экология министрлігіне қатысты да қауіп сейілмейді: жаз айларындағы экологиялық мәселелермен қатар, халықаралық күн тәртібі де бұл ведомствоға қысым түсіріп отырады.
Жалпы, арна жазғандай, кез келген министр күтпеген кадрлық шешімге дайын болуы тиіс. Қазақстанда жоғары лауазымдағы шенеуніктердің тағдыры бір сәтте өзгеріп, жаңа кабинетке жол тартуы ғажап емес.
