Іс-шараға ҚР Атом энергиясы агенттігінің төрағасы Алмасадам Сәтқалиев, “Росатом” мемлекеттік корпорациясының бас директоры Алексей Лихачёв және басқа да ресми өкілдер қатысты.
Алмасадам Сәтқалиевтің айтуынша, бұл – АЭС құрылысына дайындықтың маңызды кезеңдерінің бірі – инженерлік-іздестіру жұмыстарының ресми басталуы. Бұл кезең станцияның нақты орналасуын, конфигурациясын, сондай-ақ оның қауіпсіздігі мен сенімділігін, экономикалық тиімділігін айқындайды.
«АЭС салу жобасы кең қоғамдық қолдау тапты. Өткен жылы республикалық референдумда қазақстандықтардың 70 пайыздан астамы осы бастаманы қолдады. Әсіресе Үлкен ауылының мысалы айқын: тұрғындардың 97 пайызы дауыс беріп, соның шамамен 90 пайызы “иә” деді», – деді агенттік басшысы.
Сәтқалиевтің мәліметінше, жобаға шамамен 14–15 миллиард доллар инвестиция салынады, бұған қоса шамамен 1 миллиард доллар өңірде әлеуметтік және заманауи инфрақұрылым салуға бағытталады.
Оның айтуынша, отандық кәсіпорындар мен ғылыми-зерттеу ұйымдарының қатысуына ерекше көңіл бөлінеді. Бұл жергілікті өнеркәсіпті дамытуға, мыңдаған жаңа жұмыс орнын ашуға, сондай-ақ қазақстандық ядролық ғылымды халықаралық деңгейге шығаруға мүмкіндік береді.
«АЭС – атом саласын дамытуға, индустриялық-инновациялық серпін беруге және елдің ұзақ мерзімді экономикалық өсуін қамтамасыз етуге бағытталған стратегиялық жоба», – деп атап өтті Сәтқалиев.
Шара аясында топырақ үлгілерін алу үшін бұрғылау жұмыстары да басталды. Арнайы капсулаға салынған үлгілер кейінгі зерттеулер үшін Ресей тарапына жіберіледі.