Өзбекстан Экология министрлігінің баспасөз қызметі қазіргі уақытта екі елдің тиісті мемлекеттік органдары келіссөздер жүргізіп жатқанын растады. Құжатты тамыз айында қабылдау жоспарланған.
Келіссөздер барысында өзбек тарапы Қазақстаннан шамамен 500 киік лағын алып, оларды өз жеріне бейімдеу туралы ұсыныс білдірген. Министрлік мамандары ақбөкендердің Өзбекстан табиғи жағдайына қаншалықты бейімделе алатынын зерттемек.
Меморандум жобасында қос мемлекет киіктердің санын бақылап отыру, ортақ деректер базасын құру және оны бір жүйеге біріктіру сияқты бірлескен шараларды қолға алуға ниетті.
Айта кетейік, қазіргі уақытта Өзбекстанда бар-жоғы 100-ге жуық киік қалған. Мамандар бұл жағдайға шекара бойындағы қоршаулардың ақбөкендердің еркін қозғалысына кедергі келтіргені себеп болғанын айтады.
Еске сала кетейік, 17 маусым күні Қазақстан Президенті Қасым-Жомарт Тоқаев Қытайға 1 500 киік тарту етілетінін жариялаған болатын.
