«Президент Қасым-Жомарт Тоқаев Алматы қаласының әкімі Дархан Сатыбалдыға балалар үйін жөндеуден өткізіп, оны қаланың балансына алуды тапсырды. Мемлекет басшысының шешіміне сәйкес, балалар үйі көшірілмейді. Балалар Алматыда қалып, осы қалада оқуын жалғастырады», – деді Руслан Желдібай.
Сонымен қатар, аталған жағдайға байланысты Президент Әкімшілігі тарапынан қызметтік тексеріс жүргізілетіні де белгілі болды.
Мемлекет басшысы ата-анасының қамқорлығынсыз қалған балалардың барлық құқығы заң аясында толық қорғалуы тиіс екенін атап өтті. Бұл – баланың мүддесін қорғауға бағытталған нақты қадам және әлеуметтік әділеттілікке негізделген шешім.
Еске сала кетейік, бұған дейін «Бағанашыл» балалар үйінің Қонаевқа көшірілуі қоғамда үлкен резонанс туғызған болатын. Ата-анасыз қалған тәрбиеленушілер мен олардың қамқоршылары бұл шешімге алаңдаушылық білдірген еді. Президенттің уақтылы араласуы балалардың білім мен өмір сүру жағдайына қатысты туындаған сұрақтарға нүкте қойды.