Бұған дейін Қазақстан құрамасының бас жаттықтырушысы Қайрат Сәтжанов өзбек спортшылары турнирге келмейтінін айтқан еді. Осы мәлімдемеден соң әлеуметтік желілерде түрлі болжамдар мен алып-қашпа сөздер тарады. Алайда күмәнге толы пікірлерге нүкте қойылды.
Өзбекстандық ақпарат құралдарының мәліметінше, бұл елдің құрамасы жарысқа қатысады. Дегенмен бір ерекшелігі бар: жарысқа тек әйелдер құрамасы ғана тіркелген. Ерлер командасынан бірде-бір боксшы қатыспайды.
Айта кетейік, бұл жарыс — бокстан әлем кубогінің үшінші кезеңі. Бұған дейінгі екі кезеңде Өзбекстан құрамасы жалпыкомандалық есепте топ жарған. Ал Қазақстан алғашқы кезеңге қосалқы құраммен қатысып, екі алтын медаль еншілеген. Екінші кезеңде елімізден тек бір ғана боксшы сынға түсті.