Ұшақты беру рәсіміне ТЖ министрі генерал-майор Шыңғыс Әрінов қатысып, жаңа әуе кемесінің құтқару бөлімшелерінің ұтқырлығын едәуір арттыратынын және табиғи апаттардың, авариялар мен басқа да оқиғалардың салдарын тиімді жоюға көмектесетінін атап өтті.
L‑410 ұшағы "Қазавиақұтқару" АҚ авиациялық паркінің құрамына енді. Оның негізгі міндеттері – жағдайды бақылау, гуманитарлық жүктер мен жеке құрамды тасымалдау, сондай-ақ зардап шеккендерді эвакуациялау. Ұшақ қиын жағдайларда жұмыс істеуге қабілетті: топырақ, қар және шөп басқан аэродромдарға қона алады, ұзындығы небәрі 500 метр болатын қысқа жолақтардан ұшып, -50-ден +50 °C-қа дейінгі температураға төтеп бере алады.
Сонымен қатар, L‑410 6500 км қашықтыққа 19 жолаушыны немесе 1800 кг жүкті тасымалдауға қабілетті.Модельдің ерекшелігі – ауыр жұқпалы аурумен ауырған науқастарды тасымалдауға арналған арнайы модификациясы болып табылады. Пайдалануға берілмес бұрын қазақстандық ұшқыштар Прагадағы авиациялық даярлау орталығында ұшақты басқару және техникалық қызмет көрсету бойынша арнайы оқудан өтті. ТЖ министрі оқытуға көмек көрсеткені үшін Omnipol компаниясының өкілдеріне алғыс айтып, халықаралық ынтымақтастықтың ТЖМ авиациясын дамытуда маңызды рөл атқаратынын атап өтті.
L‑410 ұшағын сатып алу Өнеркәсіпті дамыту қорының қолдауымен жүзеге асырылды, бұл мемлекеттің авиация саласын дамытуға және елдегі қауіпсіздікті арттыруға стратегиялық көзқарасын көрсетеді. Жаңа ұшақты пайдалануға енгізу ТЖМ авиациясының әлеуетін күшейтіп қана қоймай, жалпы Қазақстанның әуе флотының дамуына ықпал етеді. Жеңіл ұшақтарды қолдануды кеңейту, ұшқыштардың біліктілігін арттыру және авиациялық инфрақұрылымды жетілдіру – мұның бәрі елдің авиациясын заманауи, мобильді және кез келген күрделіліктегі міндеттерді шешуге дайын етеді.