Табиғатты аялау – өзімізді аялау
Наурыз мейрамының негізгі ұстанымдарының бірі – табиғатпен үндестік. 23 наурызда еліміздің әр өңірінде сенбіліктер өткізіліп, көшелер, саябақтар, су жағалаулары қоқыстан тазартылып, ағаш отырғызу шаралары ұйымдастырылады. Бұл – экологиялық мәдениетті қалыптастырудың бір жолы.
Табиғаттың тазалығы – біздің денсаулығымыз бен болашақ ұрпақтың өмір сапасына тікелей әсер етеді. Сондықтан дәл осы күні әр азамат өз ауласын, жұмыс орнын, туған жерін таза ұстауға атсалысуы керек.
Ішкі тазару – рухани кемелдену
Тек қоршаған ортаны ғана емес, жүрек пен сананы тазарту да маңызды. Бұл күні адамдар ренжіскен жақындарымен татуласу, жаман әдеттерден арылу, жаңа, жақсы бастамаларға ниет ету сияқты істерге мән береді.
Дәстүр бойынша, қазақ халқы Наурыз мейрамы кезінде кісі ақысы мен қарыздан құтылуға, құрмет пен кешірімділік танытуға ерекше назар аударған. «Өткенге өкпе жоқ, келешекке үміт көп» деген ұстаным осы күннің мәнін аша түседі.
Тазалық – ұлттық құндылық
Қазақ халқының дәстүрінде тазалықтың орны бөлек. «Тазалық – иманның жартысы» деген нақыл бекер айтылмаған. Үй ішін жинау, ескі заттардан арылу – бұл да жаңару мен өркендеудің белгісі.
23 наурыз – жай ғана сенбілік емес, тазалыққа, ұқыптылыққа, ізгілікке шақыратын күн. Әр адам осы күні өзіне бір сұрақ қойса дейміз: Мен қандай өзгеріс енгізе аламын?
Бәлкім, сіздің бүгін жасаған кішкентай тазалық шараңыз ертең үлкен өзгерістерге бастар...
Таза орта – таза сана, таза сана – жарқын болашақ!