Мәліметке сүйенсек, Денсаулық сақтау министрлігінің Санитарлық-эпидемиологиялық бақылау комитеті желілік және базар алаңдарында «мұрынға арналған хош иісті ингаляторлар» деп аталатын жарнама және сату бойынша мониторинг жүргізді.
Мониторинг нәтижелері бойынша бұл өнімдер халықтың әл-ауқатын жақсарту, шаршауды басу, күш-қуат беру, ұйқышылдық және жіті респираторлық вирустық инфекциялардың белгілерін емдеу құралы ретінде жарнамаланатыны анықталды.
Алайда, өнім дәрі-дәрмек немесе медициналық мақсаттағы бұйым болып табылмайды және мемлекеттік тіркеуден өтпейді.
Атап айтқанда, бұл өнімдер сәйкестікті растау құжаттарымен расталмаған, өнімнің таңбалауында құрамы туралы ақпарат жоқ, қолдануға қарсы көрсетілімдер жоқ, жас шектеулері туралы ақпарат жоқ, сол арқылы азаматтардың өмірі мен денсаулығына қауіп төндіреді.
Комитет халықтың өмірі мен денсаулығын қорғау мақсатында уәкілетті органдарға жарнама және сатуға жол бермеу бойынша шаралар қабылдауды ұсынды. Комитеттің аумақтық департаменттеріне және Ұлттық сараптама орталығына сынақтық сатып алу аясында осы өнімдерге зерттеу жүргізу тапсырылды, оның нәтижелері мен Комитет қабылдаған шаралар туралы қосымша хабарланады. Қазіргі уақытта аталған өнімдерге қатысты тұрғындардан Комитетке өтініштер мен шағымдар түскен жоқ,- деп мәлімдеді Санитарлық-эпидемиологиялық бақылау комитетінің баспасөз қызметі.
Айта кетелік, нарколог дәрігерлердің айтуынша, бұл препарат тәуелділік тудырады.