ҚР Ұлттық Ғылым академиясының вице-президенті, Назарбаев Университетінің биология профессоры Дос Сарбасов препаратты сынау барысы туралы ақпарат берді, деп хабарлайды Newsroom.kz
Препаратты клиникалық сынақтан өткізу 2022-2023 жылдары басталған. Жақында жүргізілген алғашқы екі кезеңнің нәтижелері сәтті болды. Дәрі-дәрмекті қабылдаған он бес онкологиялық науқастың алтауында ісіктің өсуі тоқтап, бір науқаста ісік 30%-ға азайды.
"Біз клиникалық сынақтың 1-ші және 2-ші кезеңдерін өткіздік. Қазіргі уақытта препараттың дозасын арттыруға қол жеткіздік, өйткені оның уыттылығы жоқ екені расталды. Сынақтар Қазақ онкология және радиология институтында өтуде. Бұл препарат рак клеткаларының глюкозаны сіңіруін тоқтатады. Біз халықаралық патент алдық, бұл біздің жетістігімізді заңды түрде бекітеді. Бақылау тобындағы 5 пациенттің жағдайы тұрақтанды. Істі соңына дейін жеткізіп, 2-3 жыл ішінде жобаны аяқтауды жоспарлап отырмыз", — деді Дос Сарбасов.
Ғалымдар қатерлі ісікке қарсы тиімді препаратты нарыққа шығару арқылы онкологиялық аурулармен күресте жаңа қадам жасауға үміттеніп отыр.