Қайғылы оқиға бүгін Атырау қаласы маңындағы Құрсай ауылындағы жеке балабақша аумағында орын алған.Оқиғаның болғанын Атырау қаласының білім бөлімі де растады, – деп хабарлайды newsroom.kz порталы Aikyn.kz сайтына сілтеме жасап.
«Оқыс оқиға 10 шілде күні сағат 11:00 шамасында «Чебурашка» жеке балабақшасында болған. Күндізгі серуен кезінде төрт жасар бала кәріз септигіне түсіп, суға батып кеткен. Сәбидің денесін балабақша қызметкерлері шығарған. Қазір тиісті органдар оқиғаның мән-жайын анықтап жатыр. Аталған жайтқа қатысты құрылтайшының түсініктеме беруін күтіп отырмыз. Марқұмның отбасына қайғырып көңіл айтамыз», – деді Атырау қалалық білім бөлімінің басшысы Айнагүл Дүйсекенова.
Атырау облысы полиция департаменті қайғылы оқиғаға қатысты қылмыстық іс тіркеліп, тергеп-тексеру жұмыстары жүріп жатқанын хабарлады.