Биыл көктемде Түркістан облысы мен Өзбекстан Республикасы, Ташкент облысы арасында туризм саласын дамыту бойынша ынтымақтастық меморандумына қол қойылған еді. Бүгінгі таңда екі тарап өзара ұсыныстарды негізге ала отырып, нақты істерді қолға алуда.
Осы мақсатта Түркістан облысы мәдениет және туризм басқармасынан құрылған ақпараттық-насихат тобы Ташкент облысына іссапармен барды.
«Welcome to Turkistan - 2023» тақырыбындағы ақпараттық турды «Open Turkistan» туристік ақпараттық орталығы ЖШС-нің директоры Серік Сандыбаев, «Turan tour» туристік агенттігінің жетекшісі Исмаил Омаралиев жүргізді, деп хабарлайды newsroom.kz.
Кездесуге Ташкент облысы әкімінің орынбасары Жамшид Бабажанов, «Manzara tourism» туристік компаниясының бас директоры Сардор Нозимов, Ташкент облысы туризмді дамыту басқармасының басшылығы және туристік операторлар қатысты. Жиында екі облыстың туристік әлеуеті таныстырылды. Туристердің санын арттыру бойынша ұсыныстар талқыланды.
Екі тарап та әуелі көлік қатынасын жолға қою керектігін алға тартты. Түркістан облысы әкімдігі мен Қазақстанның жауапты министрлігі Өзбекстан Республикасына ұсыныс хат жолдаған. Онда тек әуе рейстерін ашу, автобустар қою мәселелері қамтылған. Ташкент облысының әкімдігі бұл мәселені жіті бақылауға алатын болды.
Кездесу соңында Түркістан және Ташкент облыстарының жауапты басқармалары арасында меморандумға қол қойылды. Енді Түркістан облысының туристік маршруттары Ташкент облысының барлық аудан, қалаларында насихатталады. Түркістан өңірінде де дәл солай Ташкент облысының туристік әлеуеті кеңінен ұсынылады. Осылайша діні, тарихы, мәдениеті, салт-дәстүрі ұқсас екі ел бір-бірімен өзара қарым-қатынасты қуана қабыл алды. Енді туристер алмасу және олардың санын арттыру бойынша шараларды бірлесіп атқарады.
Сонымен қатар «Open Turkistan» туристік ақпараттық орталығы ЖШС-і Өзбекстанның Manzara Tourism, Silk Road Bus and Transportation, Alizam Consult Group және Travel Plaza жалпы 4 туристік компанияларымен меморандум түзді. Бұл келіссөздерде Түркістан облысының туризмін дамытуға басымдық беріледі.
Айта кетейік, Түркістан өңірінің туризмін дамыту бойынша 3 бағыт айқындалған. Олар: тарихи-танымдық, экологиялық және емдік-сауықтыру туризмі.
«Open Turkistan» туристік ақпараттық орталығы