Шамалғанда «Елбасы жолы» экспедициясы басталды

Экспедицияның басты мақсаты – Қазақстан Республикасы Тұңғыш Президенті – Елбасы Н.Ә. Назарбаевтың шығармашылық және саяси жолын кеңінен насихаттау, өмірінен сыр шертетін маңызды орындарды аралау деп хабарлайды «Елбасы Академиясы» қорының баспасөз қызметіне сілтеме жасаған newsroom.kz порталы. Аталмыш шараның тағы бір мақсаты - «Ел Үміті» бастамасы аясындағы жоба қатысушыларымен бас қосу. Олар 25-31 қазан аралығында Шамалған ауылына,  Қаскелең мен Алматы қаласына, Түркістан қаласының көрікті жерлерін аралап болған соң,   Теміртау мен Нұр-Сұлтан қаласына қарай  бет алады. Бұл игі шара «Елбасы Академиясы» КҚ ұйымдастыруымен қолға алынып отыр. Аталмыш жобаға Тұңғыш Президенттің «Ел Үміті» бастамасы аясында жүзеге асып жатқан жобалардың үздік, белсенді қатысушылары арасында іріктеу жүргізіліп, нәтижесінде 10 жалынды жастар анықталған. Олар іс-шара аясында өңірлердегі «Ел Үміті» бастамасының 45 шақты жоба қатысушыларымен бас қосатын болады. Экспедиция кемел ойлы Елбасының  кіндік қаны тамған Алматы облысы, Қаскелең ауданы, Шамалған ауылынан бастау алады. Қатысушылар бала күнінде ұшқыш болуды армандаған Елбасының  сұңғыла саясаткерге айналғанынан хабардар болып, балалық шағының куәсі болған мекенді аралайды. Экспедиция мүшелері Үшқоңыр тауының етегіндегі ҚР Тұңғыш Президенті Нұрсұлтан Әбішұлы Назарбаевтың «Атамекен» тарихи-мәдени орталығына бас сұғады. Онда Елбасының өмірі туралы ғана емес, тәуелсіз Қазақстанның тарихы мен Нұр-Сұлтан қаласы туралы бай материалдар қамтылған.  Мектеп қабырғасындағы сәттер  мен  еңбек қызметі жөнінде құнды мәліметтер бар.

Жоба қатысушылары Қаскелең қаласындағы 63 жыл бұрын Елбасы қанат қаққан «Абай атындағы орта мектеп-гимназиясына» барып, «Ел Үміті» бастамасы  аясында жүзеге асырылып жатқан «Birge Oqý» онлайн мектебінің оқушыларымен кездеседі. «Birge Oqý» онлайн мектебінде «Мың бала» Ұлттық зияткерлік олимпиадасының финалистері мен жеңімпаздары оқып жатыр (жоба «Ел Үміті» бастамасы  аясында жүзеге асырылады). Онлайн мектепте балалар сапалы цифрлық білім беру ресурстарына кіріп, Назарбаев Зияткерлік мектептерінің, Республикалық физика-математика мектебінің және елордалық лицейлердің 104 жоғары білікті ұстазы, 33 тьютор, 10 әдіскерден білім алуда.

«Мың бала» және «Birge Oqý» жобалары ауыл мен қала мектептері арасындағы білім беру сапасын қысқартуға ықпал етеді.  Қазір онлайн мектепте республиканың 14 облысынан 3 мыңнан астам оқушы, оның ішінде Алматы облысынан 304 оқушы тегін қосымша білім алып жатыр. Ауыл мектебінде оқыған балаларды қолдап, ары қарай дамыту үшін «Мың бала» олимпиадасы екінші жыл қатарынан өткізілді. Биыл Алматы облысы бойынша олимпиадаға 5-6 сыныпта оқитын 29 342 оқушы қатысты. Жүлделі орындарға 200 оқушы ие болды. Дарынды балаларға арналған мамандандырылған мектептерге 6 сынып оқушыларынан 44 жеңімпаз қабылданды. Атап айтар болсақ, Алматы қаласындағы Республикалық физика-математика мектебі, «Білім-Инновация» лицейі, «Дарын» мамандандырылған мектептері. Жоба қатысушылары әрі қарай Алматы қаласына барып, Республикалық физика-математика мектебінің мән-жайымен танысады. Бұл мектепте «Мың бала» олимпиадасының 35 жеңімпазы білімін жетілдіріп жатыр. Келесі кезекте  Нұрсұлтан Назарбаев Қорында халықаралық олимпиадада топ жарған «Ел мақтанышы» сыйлығының иегерлері бас қосып, ғылымға енгізген жаңалықтар мен түрлі идеялар төңірегінде пікіралмасады.

Ары қарай экспедиция қатысушылары Түркістан мен Шымкент қалаларына бет алады.