ҚР Тұңғыш Президентінің баспасөз хатшысы Айдос Үкібай Елбасының денсаулығы туралы сұрақтарға жауап берді. Бұл туралы ол өзінің Твиттердегі парақшасында жазды, - деп хабарлайды NewsRoom+ тілшісі Oinet.kz ақпарат агенттігіне сілтеме жасап.
- Нұрсұлтан Назарбаевтың көңіл-күйі жақсы, сырқат симптомсыз өтіп жатыр. Дене қызуы қалыпты, КВИ-ге тән белгілер байқалған жоқ. Тұңғыш Президент дәрігерлердің бақылауында. Олардың айтуынша, алаңдауға еш негіз жоқ, - деді А.Үкібай.
Мәлім етілгендей, оқшаулану талабына байланысты Елбасы қашықтан жұмыс істеп жатыр. - Елбасы шетел басшыларынан келген хаттарды да, отандық жанашырларынан келген ыстық лебіздерді де оқып отыр. Нұрсұлтан Назарбаев үшін әр хаттың орны бөлек.
Олардың барлығы Тұңғыш Президенттің тезірек сауығып кетуін тілейді, - деп жазды Айдос Үкібаев өзінің твиттердегі парақшасында. Айта кетейік, Елбасының баспасөз хатшысы Қазақстанның Тұңғыш Президенті Нұрсұлтан Назарбаевтың COVID-19-ға тапсырған сынамасы оң нәтиже көрсеткенін хабарлаған еді.
