Маңғыстау облысында қаза тапқан және зардап шеккен әскери қызметкерлердің отбасыларына қаржылай көмекті бөлу жөніндегі комиссия өз жұмысын аяқтады. «Ұлттық рух» қорына түскен барлық қаражат толық таратылғаны хабарланды.
Бұл туралы өңір әкімдігі жариялаған мәлімдемеде Қазақстан Халық Кеңесінің мүшесі, облыстық қоғамдық кеңестің төрағасы Бекмұрат Жүсіпов айтты. Оның сөзінше, көмек президент Қасым-Жомарт Тоқаевтың тапсырмасына сәйкес көрсетіліп отыр.
Қаражаттың мақсатты жұмсалуын бақылау үшін арнайы комиссия құрылған. Оның құрамына құқық қорғау органдарының өкілдері, қоғам қайраткерлері, Құрылтай депутаттары, Қазақстан Халық Кеңесінің мүшелері, қоғамдық кеңестер мен мәслихаттардың өкілдері кірді.
Жүсіповтің айтуынша, қаза тапқан әскери қызметкерлердің отбасыларына қаражат комиссия шешіміне және заңда белгіленген тәртіпке сай тең бөлінген. Оқиғадан аман қалған әскери қызметкерлерге де бөлек төлем қарастырылып, оның мөлшерін комиссия анықтаған.
Ақша есебі мен бөлуге қатысты шешімдер қаза тапқан сарбаздардың ата-аналарының қатысуымен қабылданып, хаттамамен рәсімделген. Комиссия қаражаттың қорға түсуінен бастап, алушыларға аударылғанға дейінгі бүкіл үдерісті бақылауда ұстаған.
«Әскери қызметкерлердің туған-туыстарының өтініші бойынша әрі олардың қауіпсіздігі мен құпиялылығын сақтау мақсатында нақты төлем сомалары мен алушылардың жеке деректері жария етілмейді», — деді Бекмұрат Жүсіпов.
24 қыркүйекте Маңғыстау облысындағы оқу-жаттығу кезінде 17 әскери қызметкер Каспий теңізіне кеткен. Олардың 14-і қаза тапқан.
Оқиғаға байланысты абайсыздық және кеме жүргізу қағидаларын бұзу бабы бойынша қылмыстық іс тергеліп жатыр, Қорғаныс министрлігінің бес офицері ұсталған. Үкіметтік комиссия да оқиғаның мән-жайын зерттеп жатыр.
Қаза тапқан әскери қызметкерлерге «Айбын» ордендері берілді, ал аман қалған үш адам «Ерлігі үшін» медалімен марапатталды.
