Солтүстік Қазақстан облысында балық аулауға барған ерлі-зайыпты әскери атыс полигоны аумағында оқ жауған жерге тап болды. Оқиға туралы әйел адам әлеуметтік желіде жазды.
Оның айтуынша, олар Есіл өзеніне сүйікті орнына барған сәтте атыс басталған. «Алдымен алыстан естілді, кейін оқтар басымның үстінен ысқырып өте бастады. Шамамен 50 сантиметр жерден бірнеше оқ өтті», — деді ол.
Әйел жерге жатып, өзін оқтан сақтауға тырысқанын айтты. Біршама тыныштық орнағанда ол жолға қарай, көлігі тұрған жаққа жүгірген. Алайда атыс қайта күшейіп, ол тағы да жерге құлаған. Кейін күйеуі келіп, екеуі қауіпсіз жерге кеткен.
«Бізге оқ тимегеніне шүкір, бірақ тимеуі мүмкін емес еді. Егер бойым ұзындау болып, дер кезінде қимылдамасам, оқ тиер еді. Әскери жаттығу кезінде адамдардың қауіпсіздігіне кім жауап береді? Неге аумақ қоршалмаған? Неге ескерту белгілері жоқ?» — деп жазды ол.
Солтүстік Қазақстан облыстық полиция департаментінің басшысы Руслан Назаровтың айтуынша, аталған жерде әскери полигон бар және ол аумақта әскери бөлімдер, шекарашылар, Ұлттық ұлан академиясы, кейде полиция да атыс жаттығуларын өткізеді. Оның сөзінше, сол күні де атыс болған.
«Оқиға тіркелді, тексеру жалғасады. Қазір кімнің атыс жүргізгенін және неге қажетті қауіпсіздік шаралары қабылданбағанын анықтап жатырмыз», — деді ол.
Жергілікті тұрғындар бұл аумақта бұған дейін де осындай жағдайлар болғанын жазып, ескерту белгілері мен қоршау неге жоқ екенін сұрады. Бұған дейін, 2022 жылдың сәуірінде Петропавлдағы Ұлттық ұлан академиясының атыс алаңында құм қазып жүрген жұмысшы жараланғаны хабарланған еді.
