Зерттеу авторларының пікірінше, мұндай ауқым Қытайды 5G технологиясының ең ірі тұтынушысы ғана емес, оны одан әрі дамытуға арналған негізгі алаңдардың біріне айналдырып отыр. Дәл осы елде мобильді желілерді пайдаланудың жаңа сервистері мен үлгілері жиі пайда болып, кейін басқа мемлекеттерге таралуы мүмкін.
Саннан сапаға және жаңа мүмкіндіктерге көшу
Бірнеше жыл бұрын байланыс операторларының басты міндеті желілердің қамту аясын кеңейтіп, жаңа пайдаланушыларды қосу болса, қазір негізгі назар қызмет көрсету сапасын арттыруға және жаңа цифрлық сервистерді дамытуға ауысты.
Бұл үдерісте 5G-Advanced технологиясын енгізу маңызды рөл атқарады. Ол – 5G технологиясын дамытудың келесі кезеңі. Мұндай желілер Қытайдың материктік бөлігіндегі 330-дан астам қалада коммерциялық негізде жұмыс істеп тұр. Олар деректерді әлдеқайда жоғары жылдамдықпен жеткізуге, кідірісті азайтуға және күрделі цифрлық қызметтерді қолдауға мүмкіндік береді.
Сарапшылардың болжамынша, дәл осы 5G-Advanced технологиясы мобильді жасанды интеллект қызметтерінің, толықтырылған және виртуалды шындық технологияларының, кәсіпорындарды цифрландырудың және қалалық инфрақұрылымды жаңғыртудың негізгі платформасына айналады.
Экономикаға қосқан үлесі
GSMA бағалауынша, 2025 жылы мобильді технологиялар мен олармен байланысты сервистер Қытай экономикасына шамамен 1,5 триллион АҚШ доллары көлемінде табыс әкелген. Бұл елдің жалпы ішкі өнімінің шамамен 7,2 пайызына тең.
Онжылдықтың соңына қарай бұл көрсеткіш 2,1 триллион долларға дейін өседі деп күтілуде. Сарапшылар мұндай өсімді мобильді байланыстың одан әрі кеңеюімен ғана емес, сондай-ақ жасанды интеллект технологияларын экономиканың түрлі салаларына белсенді енгізумен байланыстырады.
