Ұйымдастырушылардың мәліметінше, марафонда ең жоғары белсенділік танытып отырғандар – оқушылар мен ұстаздар. Бүгінде оқушылардың үлесіне 600 мыңнан астам кітап, ал педагогтарға 400 мыңнан астам кітап тиесілі. Осылайша, екі санат бойынша оқылған шығармалардың жалпы саны бір миллионнан асып, барлық нәтиженің шамамен үштен екісін құраған.
Жоба аясында оқырмандарды ынталандыру үшін арнайы марапаттау жүйесі де іске қосылды. Енді әрбір бес кітап оқыған қатысушыға жетістігіне қарай ерекше белгі беріледі.
Алғашқы бес кітапты аяқтағандар «Талапты оқырман» атты қола белгіге ие болды. Сонымен қатар қатысушылар өздерінің жеке кабинеттері арқылы марапатты растайтын сертификатты жүктей алады.
Келесі кезеңдерде де оқырмандарды жаңа марапаттар күтіп тұр. Атап айтқанда, 10 кітап оқығандарға «Жігерлі оқырман» күміс белгісі, ал 15 кітапты аяқтағандарға «Зерделі оқырман» алтын белгісі табысталады.
Алғашқы қола белгілерге қол жеткізгендердің қатарында Қарағанды және Түркістан облыстарынан «Кітап оқитын педагог» бағыты бойынша қатысқан мұғалімдер бар. Екі ұстаз да бес кітап оқып, мүмкін болған ең жоғары 1750 ұпай жинаған.
Қарағанды облысы Теміртау қаласындағы «Бірінші Теміртау классикалық лицейінің» бастауыш сынып мұғалімі Татьяна Владимировна Мининкованың айтуынша, мұғалімнің кітап оқуға деген қызығушылығы оқушыларға да әсер етеді. Оның сөзінше, қазір шәкірттері ұстазының қандай шығарма оқып жүргеніне қызығып, өздері де кітаптарын әкеліп жүр. Педагог қола белгіні келесі марапатқа жетуге берілген жақсы ынталандыру деп бағалайды.
Ал Түркістан облысы Созақ ауданындағы Ы. Алтынсарин атындағы мектептің география пәні мұғалімі Сәуле Тұрарқызы Ерманова марафонның кітап оқуды күнделікті дағдыға айналдыруға көмектескенін айтады.
Оның сөзінше, жұмысбастылыққа байланысты кітап оқуға үнемі уақыт бөлу оңай емес. Алайда жобаға қатысу бұл әдетті қалыптастыруға мүмкіндік берген. Мұғалім қазақ және орыс тілдеріндегі шығармаларды оқып, география сабақтарында кітаптардан алған жаңа мәліметтер мен мысалдарды да пайдалана бастаған.
Осылайша, «Кітап оқитын ұлт» марафоны қатысушылардың оқу белсенділігін арттырып қана қоймай, кітап оқуды күнделікті өмірдің бір бөлігіне айналдыруға бағытталған.