Президенттің айтуынша, бұған дейін бұқаралық ақпарат құралдарында екі ірі ұлттық компания басшыларының ұсталғаны туралы ақпарат тараған. Тоқаев бұл оқиғаның мемлекеттік компаниялардағы жемқорлық мәселесінің әлі де өзекті екенін көрсететінін атап өтті.
Мемлекет басшысы тергеу амалдары енді ғана басталғандықтан, оның барысы мен нақты мән-жайларын жариялауға заң жүзінде шектеу бар екенін еске салды. Сондықтан әзірге тергеудің нәтижесі туралы түпкілікті қорытынды жасауға ерте.
Сонымен қатар Президент бұл істің саяси және құқықтық тұрғыдан маңыздылығына тоқталды. Оның сөзінше, «Заң мен тәртіп» қағидаты мемлекеттік басқару мен қоғамдық өмірдің негізгі ұстанымы ретінде бекітілгеннен кейін мемлекеттік компаниялар жүйесіндегі сыбайлас жемқорлыққа қатысты мұндай ауқымды іс алғаш рет тіркеліп отыр.
Тоқаев сөзінің жалғасында жаңа Конституцияның маңызын атап өтті. Оның айтуынша, Ата заң 15 наурызда өткен жалпыұлттық референдумда қабылданып, 1 шілдеде күшіне енген. Президент бұл құжатты «Халық Конституциясы» деп атады.
Мемлекет басшысы Конституция талаптарын бұзуға, оның ережелерін елемеуге немесе елдің басты құжатын қорлауға ешкімнің құқығы жоқ екенін қатаң ескертті.
