Үндістанның солтүстігіндегі Уттар-Прадеш штатында үш күн бойы жауған нөсер салдарынан кемінде 56 адам қаза болып, 46 адам жарақат алған. 1 мыңнан астам үй зақымданған. Штаттың 75 ауданының 56-сына қатты жаңбыр әсер еткен.
Синоптиктердің мәліметінше, 25–27 қыркүйек аралығында өңірде 66,5 мм жауын-шашын түскен. Бұл кезеңдегі қалыпты көрсеткіштен бірнеше есе жоғары.
Жауын салдарынан Ганг және басқа да өзендердегі су деңгейі көтерілген. Кейбір аудандарда тұрғындарды эвакуациялау жұмыстары жүргізіліп, мектептер уақытша жабылған.
Непалда да жағдай күрделі. Бұған дейін билік 14 адамның қаза болғанын және 11 адамның жоғалғанын хабарлаған еді. Елдің 77 ауданының 49-ында су тасқыны қаупі жарияланған.
Алайда 29 қыркүйектегі кейінгі мәліметтер бойынша, Непалда 24–28 қыркүйек аралығындағы су тасқыны мен көшкіндерден қаза болғандар саны 27-ге жеткен. Төрт адам әлі із-түзсіз жоғалып, сегіз адам жарақат алған.
Елдің бірқатар өңірінде үйлер қирап, жолдар мен көпірлер зақымданған. Су тасқыны салдарынан электр және байланыс желілерінің жұмысы да үзілген.
Жағдай Үндістанның солтүстігіндегі аймақтарға да әсер етіп отыр. Непалдағы жауын-шашыннан Гандак өзенінің деңгейі көтеріліп, Үндістанның Бихар және Уттар-Прадеш штаттарында су тасқыны қаупі күшейген. Кей жерлерде өзен жағалауларындағы бөгеттер зақымданып, тұрғын аудандарға су жайылған.
Құтқару және гуманитарлық көмек көрсету жұмыстары жалғасып жатыр. Мамандар өзендердегі су деңгейін бақылауда ұстап, қауіп төнген елді мекендердегі тұрғындарды қауіпсіз жерге көшіру шараларын жүргізуде.
