Украина мен Ресей бір-бірінің аумағындағы нысандарға соққы беруді жалғастырып жатыр. Украинаның Бас штабы Пермь, Ростов, Ульяновск, Воронеж және Тула облыстарындағы кәсіпорындарға шабуыл жасалғанын мәлімдеді.
Украина президенті Владимир Зеленскийдің айтуынша, түнде Пермь мен Новошахтинскідегі екі мұнай өңдеу зауытына соққы берілген, сондай-ақ Ульяновскідегі «Завод Искра» қорғаныс кәсіпорнына шабуыл жасалған. Бас штаб кейін бұл нысандардың қатарында «Лукойл-Пермнефтеоргсинтез», Новошахтинск мұнай өнімдері зауыты, «Завод Искра», Ефремов синтетикалық каучук зауыты және «Воронежсинтезкаучук» бар екенін хабарлады.
Ресей өңірлерінің губернаторлары да шабуылдар болғанын растады. Ульяновск губернаторы Алексей Русскихтің айтуынша, қалада өнеркәсіптік және азаматтық инфрақұрылымға зақым келген. Кейінірек ол алты көпқабатты үй бүлінгенін, олардың бірінде ішінара құлау болғанын, 12 адам жараланғанын, олардың арасында екі бала бар екенін айтты.
Пермь өлкесінің губернаторы Дмитрий Махониннің мәліметінше, ПВО мен мобильді атыс топтары 39 БПЛА-ны атып түсірген. Дрон сынықтарынан бір ер адам қаза тапқан. Ал Ростов облысында Новошахтинск мұнай өнімдері зауытына зиян келгені айтылып, кәсіпорын жұмысы тоқтағаны хабарланды.
Воронежде және облыстың кемінде алты ауданында 88 дрон атып түсірілген. Өңір басшысы Александр Гусевтің айтуынша, қалада көпқабатты және жекеменшік үйлер мен көліктер зақымдалған, 13 адам жараланған, олардың ішінде алты жастағы бала бар. Екі адам жансақтау бөліміне түскен.
Ресей әскерінің Киевке жасаған шабуылдары да жалғасып жатыр. Жұма күні таңертең және күндізгі соққылардан кейін қалада жараланғандар саны 50-ден асты, қаза тапқандар саны жетіге жетті. Печерск ауданында БПЛА 16 қабатты тұрғын үйге тиіп, 14 жастағы бала қаза тапты. Соломянск ауданында офис ғимараты маңындағы автотұрақтан төрт адамның мәйіті табылды.
Украина президенті Владимир Зеленский Одессада почта терминалына жасалған қайталама соққыдан бір адамның қаза тапқанын, Запорожьедегі медициналық клиникаға шабуыл жасалғанын және Сумы мен Николаев облыстарында да зардап шеккендер бар екенін айтты.
Осы кезде АҚШ Ресей, Украина және өздерінің қатысуымен үшжақты байланыстарды жандандыру мүмкіндігін талқылап жатыр. АҚШ мемлекеттік хатшысы Марко Рубио Мәскеу мен Киев шектеулі бітімге, соның ішінде астық және энергетика инфрақұрылымын қамтитын режимге қызығушылық танытқанын айтқан. Кремль өкілі Дмитрий Песков Кирилл Дмитриевтің америкалық келіссөзшілермен байланысын жалғастырып жатқанын мәлімдеді.
