Қазақстанның Ұлыбританиядағы елшісі Алибек Бақаев Халықаралық теңіз ұйымының бас хатшысы Арсенио Домингеспен кездесіп, сауда кемелерінің қауіпсіздігін, Транскаспий бағытының дамуын және Ақтау мен Құрық порттарын жаңғырту мәселелерін талқылады.
Қазақстанның Сыртқы істер министрлігі хабарлағандай, тараптар Қазақстан мен ИМО арасындағы ынтымақтастықтың қазіргі жағдайы мен болашағын да қарастырды. Кездесуде Каспий теңізінің халықаралық көлік-логистика тізбегіндегі рөліне ерекше назар аударылды.
Әңгіме барысында Транскаспий халықаралық көлік бағытының теңіз бөлігін дамыту, Каспий арқылы жүк тасымалының артуы және Ақтау мен Құрық порттарын жаңғырту Орталық Азия, Қытай мен Еуропа арасындағы сауда-экономикалық байланыстарға жаңа мүмкіндік ашатыны айтылды.
Тараптар Қара теңіздегі жағдайды да сөз етті. Алибек Бақаев Қазақстан мұнайын тасымалдайтын танкерлерді қоса алғанда, сауда кемелерінің қауіпсіздігін қамтамасыз етудің маңызын атап өтті.
Арсенио Домингес бұл ұстанымды қолдап, ИМО-ның Қазақстанға техникалық ынтымақтастық және халықаралық теңіз стандарттарын қолдану бағытында жәрдем көрсетуге дайын екенін растады.
Кездесу қорытындысында тараптар өзара іс-қимылды жалғастырып, Қазақстанның ИМО қызметіне қатысуы аясында нақты нәтижелерге көңіл бөлуге келісті. Қазақстан 1994 жылдан бері ИМО мүшесі болып келеді.
