Қазақстан мен Қытай астық және ауыл шаруашылығы өнімдері саудасына арналған бірлескен цифрлық платформаны іске қосты. Жаңа құрал экспорттаушылар мен қытайлық сатып алушылар арасында тікелей байланыс орнатуға мүмкіндік береді, деп хабарлады Ауыл шаруашылығы министрлігі.
Платформа жұмысының алғашқы нақты нәтижесі ретінде 24 мың тонна зығыр жеткізуге келісім жасалды.
Жоба Қытайдағы астық саудасы жөніндегі сегізінші конференция кезінде таныстырылды. Іс-шараға ауыл шаруашылығы вице-министрі Назгүл Хатепова бастаған қазақстандық делегация да қатысты.
Бірлескен платформа ҚХР-дың Ұлттық интернет-астық сауда платформасы негізінде жасалды. Бұл жүйе шамамен 50 мың ауыл шаруашылығы кәсіпорнын біріктіреді. Оператор қызметін ҚХР-дың Азық-түлік және стратегиялық резервтер жөніндегі мемлекеттік басқармасына қарасты Астық саудасын үйлестіру орталығы атқарады.
Жаңа цифрлық тетік екі ел компанияларына сауда операцияларын онлайн форматта жүргізуге, әлеуетті серіктестермен тікелей жұмыс істеуге және делдалсыз мәміле жасауға жол ашады. Сауда бәсекелі рәсімдер арқылы да, тікелей келіссөз түрінде де жүзеге асады.
Платформада ашық аукциондар, шақыру арқылы өтетін сауда, келісім бойынша жасалатын мәмілелер және белгіленген бағамен сату қарастырылған. Сонымен бірге операциялардың сенімділігі мен ашықтығын арттыру үшін кепілдік қамтамасыз ету, онлайн есеп айырысу, тәуелсіз инспекция және дауларды реттеу тетіктері енгізілген.
Назгүл Хатепованың айтуынша, платформада қазірдің өзінде 35 қазақстандық компания тіркелген. Алғашқы кезеңде бұл жүйе арқылы астық пен майлы дақылдар, өсімдік майы және майлы-май өндіру саласының өнімдері саудаланады. Кейін Қытай нарығындағы сұранысқа қарай тауарлар тізімі кеңеюі мүмкін.
