Ұлттық банктің деректеріне сәйкес, 2026 жылдың қаңтар-маусым айларында қолма-қол ақшасыз төлемдер саны өткен кезеңмен салыстырғанда 5,1%-ға өскен. Ал олардың жалпы көлемі 4,2%-ға артып, 92,1 трлн теңгені құрады.
Қазір қазақстандықтар тәулігіне орта есеппен 39 млн-нан астам қолма-қол ақшасыз төлем жасайды. Күн сайынғы операциялардың жалпы сомасы шамамен 509 млрд теңгеге жетеді.
Төлемдердің басым бөлігі цифрлық арналар арқылы жүзеге асырылады. Атап айтқанда, барлық операциялардың шамамен 90%-ы интернет, мобильді қосымшалар және QR-кодтар арқылы жасалады.
Сонымен қатар QR-төлемдер танымалдығы жағынан POS-терминалдар арқылы жасалатын карталық төлемдерді басып озған. Бұл қазақстандықтардың күнделікті есеп айырысуда цифрлық төлем құралдарын белсенді пайдаланып келе жатқанын көрсетеді.
Ал қолма-қол ақша шешіп алу операцияларының саны керісінше азайып отыр. Ұлттық банктің бағалауынша, бұл халық арасында цифрлық төлем сервистеріне деген сұраныстың артып келе жатқанын аңғартады.
Мамандардың пікірінше, мобильді банкинг пен QR-төлемдердің кең таралуы төлем жасау процесін жеңілдетіп, қолма-қол ақшаны пайдалануға деген қажеттілікті төмендетіп отыр.
