Турнирге Орталық және Батыс Азия елдерінен келген үздік жас теннисшілер қатысты. Жарыс қорытындысы бойынша қазақстандық спортшылар бірнеше жүлделі орынға ие болды.
Ұлдар арасында Иран өкілі Киараш Садегизейди жеңімпаз атанды. Қазақстандық Родион Трайгель күміс жүлдеге ие болса, Бексұлтан Бауыржанов үшінші орын алды. Тағы бір отандасымыз Амир Аскар төртінші орынға тұрақтады. Осылайша, Қазақстанның үш өкілі үздік төрттіктен көрінді.
Қыздар арасында Өзбекстан өкілі Александра Бармичева топ жарды. Қазақстандық Алуа Марат екінші орынға ие болса, Айым Қанағатова қола жүлдені еншіледі. Тамина Сакен жарысты төртінші орынмен аяқтады.
Іріктеу кезеңінің жеңімпаздары қазан айында Жапонияда өтетін «Roland-Garros Junior Series by Renault» турнирінің финалдық кезеңінде Батыс және Орталық Азия атынан өнер көрсету мүмкіндігіне ие болады.
Алматыдағы дода жасөспірімдер теннисін дамытуға бағытталған маңызды халықаралық жарыстардың біріне айналды. Биылғы турнирге 16 жасқа дейінгі 16 ұл мен 16 қыз қатысты.
Жарыс Қазақстан теннис федерациясы, Азия теннис федерациясы (ATF) және Алматы қаласы әкімдігінің қолдауымен ұйымдастырылды.
