Нигерияның солтүстік-батысындағы Сокото штатында шамамен 70 жолаушы мінген қайық өзенде аударылып, кемінде 48 адам қаза тапты. Оқиға бейсенбі күні таңертең адамдар өзен жағасындағы күріш алқаптарына бара жатқан кезде болған.
Горау ауылының тұрғыны Хуссейни Шеху BBC-ге берген түсініктемесінде:
«Қазір жағдайымыз тым ауыр»деді. Оның айтуынша, апат болған жер шалғай орналасқан, байланыс нашар және көмекке жету қиын болған.
Ауыл мешітінде түсірілген суреттерде табылған мәйіттердің бірқатары жерлеу алдында кілемше мен дәстүрлі матамен оралғаны көрінеді. Әзірге шамамен 10 адам құтқарылғаны айтылады.
Осы өңірдің өкілі Башир Усман Горау қаза тапқандардың арасында балалар көп екенін айтты. Ауылдық жерлерде балалар егіншілік жұмыстарына көмектесу үшін жиі ата-анасымен бірге егістікке барады, ал қазір мұнда күріш жинау маусымы жүріп жатыр.
Нигерияның төтенше жағдайлар жөніндегі ұлттық агенттігі оқиға орнына жетті. Ресми орындар іздестіру-құтқару жұмыстары жалғасып жатқанын, бірнеше адамның әлі де табылмағанын хабарлады.
Гораудың айтуынша, ағаш қайық шамадан тыс жүктелген әрі оның корпусынан су кіретін тесік пайда болған. Шеху қауіпсіздік күштері ол жерге бара алмағанын, өйткені бейсенбі күні маңайда қарулы топ белсенді болғанын жеткізді.
Нигерияда қайық апаттары жиі тіркеледі. Бұған жолаушылардың көп болуы, қайықтардың нашар күтімі және қауіпсіздік ережелерінің әлсіз орындалуы себеп деп айтылады. Өткен айда Жигава штатында қайық аударылып, кемінде бес адам суға кеткен болатын.
Қаңтар айында да Жигава штатынан Йобе штатына фермерлер мен балықшыларды алып бара жатқан қайық аударылып, кемінде 26 адам қаза тапқан. Ал 2024 жылғы желтоқсанда Нигер өзенінен 54 мәйіт табылған еді.
