Ақтау қаласының 19-шағынауданындағы №36 және №36/1 үйлердің тұрғындары балалар ойнайтын алаңның қазіргі жағдайына алаңдап отыр. Олардың айтуынша, алаңдағы бірнеше ойын құрылғысы жарамсыз күйге түскен.
Атап айтқанда, сырғанақтың бір бөлігі сынып, оның орнында өткір жиектер қалған. Ойын кешендерінің бірінде тесік пайда болған. Сонымен қатар алаңдағы карусель де пайдалануға жарамсыз жағдайда.
Тұрғындар бұл жағдай балалардың қауіпсіздігіне қатер төндіруі мүмкін екенін айтып, алаңқайға жөндеу жүргізуді сұрап отыр. Әсіресе күн сайын бұл жерде балалар ойнайтынына байланысты мәселені тез арада шешу қажет екенін жеткізді.
Мәселеге қатысты қала әкімдігі де түсініктеме берді. Ведомствоның мәліметінше, аталған балалар алаңқайы кондоминиумның ортақ меншігіне жатады. Осы себепті оны қалалық бюджет қаражаты есебінен жөндеуге мүмкіндік жоқ.
Әкімдік тұрғындарға алаңқайға қатысты мәселені шешу үшін «Халық қатысатын бюджет» жобасы арқылы оны жаңартуға өтінім беруді ұсынды.
Осылайша, балалар алаңқайын жаңарту мәселесін тұрғындардың өздері тиісті жоба аясында көтеріп, қаржыландыруға өтінім бере алады. Ал әзірге алаңдағы жарамсыз және қауіпті ойын элементтері тұрғындардың назарында қалып отыр.
