Сарапшылардың болжамынша, күшейіп келе жатқан «Эль-Ниньо» климаттық құбылысы 2026 жылдың тамыз-қазан айларында жоғары қарқынға жетіп, әлемнің көптеген өңірінде температураның жаңа рекордтары орнауы мүмкін.
Антониу Гутерриш әлемнің қазірдің өзінде ауа райының шектен тыс құбылыстарының салдарымен бетпе-бет келіп отырғанын атап өтті. Оның қатарында рекордтық аптап ыстық, мұхиттағы температураның бұрын-соңды болмаған деңгейге көтерілуі және Испания мен Франциядағы ауқымды орман өрттері бар.
БҰҰ Бас хатшысы аномальды ыстықты аса қауіпті фактор ретінде бағалады. Оның айтуынша, аптап ыстық денсаулық сақтау, энергетика және көлік инфрақұрылымы жүйелеріне түсетін салмақты арттырады.
Осыған байланысты БҰҰ Бас хатшысы үкіметтерді көмір, мұнай және газ өндіруге бағытталған жаңа жобалардан бас тартуға, сондай-ақ төрт негізгі бағытқа басымдық беруге шақырды. Олар: ерте ескерту жүйелерін дамыту, аптап ыстық кезінде еңбек жағдайларын қорғау, қалалық ортаны климаттың өзгеруіне бейімдеу және таза энергетикаға көшу.
ДМҰ мәліметінше, алдағы айларда Жердің құрлық бөлігінің басым бөлігінде ауа температурасы климаттық нормадан жоғары болады. Жауын-шашын режимінің өзгеруі бірқатар өңірде қуаңшылықтың күшеюіне, ал басқа аймақтарда табиғи апаттардың орын алуына әкелуі мүмкін.
Температураның ең жоғары көрсеткіштері Африкада, Оңтүстік Еуропада, Арабия түбегінде, Үндістан субконтинентінде, Шығыс Азияда, Орталық және Оңтүстік Америкада, Кариб бассейні елдерінде және Жаңа Зеландияда күтіледі.
