Кездесулерге партия төрағасы Айбек Дәдебай, Құрылтай депутаттығына кандидаттар Ирина Тен, Нұрбек Матжани, Гүлісхан Нахбаева, Рауан Кенжеханұлы, Әлия Адамбаева және Елдар Жұмағазиев қатысты.
Жастармен өткен басқосуда білім беру жүйесін цифрландыру, жасанды интеллектіні оқу процесіне енгізу, креативті индустрияны дамыту, инклюзивті білім беру және жастардың кәсіби әлеуетін арттыру мәселелері талқыланды.
Айбек Дәдебайдың айтуынша, еңбек нарығындағы өзгерістерге бейімделу үшін жастарды ерте бастан жасанды интеллектімен жұмыс істеуге үйрету маңызды. Осыған байланысты партия білім беру бағдарламаларын цифрлық экономиканың талаптарына сәйкестендіріп, жастардың заманауи мамандықтарды меңгеруіне жағдай жасауды ұсынады.
Партия волонтерлік қызметті қолдау бойынша да бірқатар ұсыныс айтты. Атап айтқанда, еріктілердің қоғамдық қызметін жоғары оқу орындарына түсу кезінде және мемлекеттік қызметке орналасуда ескеру, сондай-ақ оларға гранттар мен жеңілдетілген қаржыландыру мүмкіндіктерін кеңейту ұсынылды.
Өңір тұрғындарымен өткен негізгі кездесуде өңірлердің экономикалық дербестігін күшейту, ауылдық аумақтарды дамыту және инженерлік инфрақұрылымды жаңғырту мәселелері көтерілді. Партияның жоспарына сәйкес, 2030 жылға дейін ел бойынша 86 мың шақырым инженерлік желі салынып немесе жаңартылып, олардың тозу деңгейін 40 пайызға дейін төмендету көзделген.
Сонымен қатар партия 2029 жылға дейін республикалық маңызы бар 10 мың шақырым автожолды орташа жөндеуден өткізуді, Транскаспий халықаралық көлік бағытын дамытуды, Каспийдегі көлік-логистикалық әлеуетті арттыруды және қоғамдық көлік жүйесін кезең-кезеңімен жаңғыртуды жоспарлап отыр.
Кездесу барысында экологиялық мәселелерге де ерекше назар аударылды. Партия «Таза Қазақстан» бастамасын қолдайтынын айтып, ауа сапасын жақсарту, су ресурстарын тиімді пайдалану, қалдықтарды қайта өңдеу жүйесін дамыту, елді мекендерді көгалдандыру және өндірістік кәсіпорындарға экологиялық бақылауды күшейту бойынша жұмыстарды жалғастыруды ұсынды.
Өңір тұрғындары өз кезегінде жол сапасын жақсарту, коммуналдық инфрақұрылымды жаңарту, медициналық нысандарды дамыту, ауылдарды жоғары жылдамдықты интернетпен қамту, мәдени мұраны сақтау және жастарға арналған жаңа мүмкіндіктерді кеңейту мәселелерін көтерді.
Айта кетейік, бұған дейін «Әділет» партиясының республикалық сайлауалды штабы Атырау облысында энергетика және ауыр өнеркәсіп саласының еңбек ұжымдарымен кездесулер өткізген болатын. Облыстағы жұмыс сапары Open Air форматындағы дрондар шоуымен аяқталды.
